Specialisti i Departamentit të Shtetit të SHBA për kundërterrorizmin, Nathan Tales e rendit Kosovën ndër vendet që kanë pasur sukses në trajtimin e luftëtarëve të kthyer nga ISIS.

Koordinatori amerikan për kundërterrorizmin, ambasadori Nathan A. Tales, thotë se Kosova është një nga vendet e para në riatdhesimin e qytetarëve të vetë, që kanë luftuar për ISIS. Në një konferencë për shtyp, mbajtur të enjten (01.08) në Departamentin e Shtetit, ambasadori Tales u shpreh: “Sa i përket riatdhesimit dhe gjykimit të luftëtarëve të huaj ne kemi pasur disa suksese dhe duam që ato të shtohen. Vende si Kazakistani dhe Kosova kanë qenë në gjendje të riatdhesojnë dhjetra dhe në disa raste qindra luftëtarë dhe familjarë të tyre, kanë dënuar ata që kanë bërë krime dhe kanë dërguar në qendra rihabilitimi fëmijët dhe familjarët, të cilët marrin pjesë në programe çradikalizimi dhe integrimi”.

Ambasadori Tales kërkoi që më shumë vende të bëjnë të njëjtën gjë. Ai u shpreh: ”Çdo vend është i detyruar të zgjidhë problemin e qytetarëve të vet, që kanë shkuar për të luftuar për ISIS. Asnjë vend nuk duhet të presë që SHBA ose SDF, forcat demokratike siriane, të zgjidhin këtë problem për ta. Ky është një problem që ka të bëjë me vendin ku janë radikalizuar më parë këta luftëtarë të huaj”.

Tales theksoi se i ashtuquajturi Kalifati ISIS është shkatërruar, por lloje të tjera të ISIS vazhdojnë të jenë të gjalla në gjithë botën. Ai përmendi Afrikën dhe Azinë juglindore si shembuj ku shihen rreziqe.

Konferencën e shtypit Tales e mbajti së bashku me ambasadorin James Jeffrey, të dërguarin special për koalicionin botëror kundër ISIS, i cili foli për rezultatet e luftës kundër ISIS në Siri dhe Irak. Në Siri lufta kundër ISIS ka pasur sukses, por në pjesë të ndryshme të vendit ISIS vazhdon të jetë aktiv. Edhe në Irak ka grupe terroriste të lidhura me ISIS.

Çlirimi i disa zonave të Sirisë ka prodhuar një numër të madh luftëtarësh të huaj dhe terroristësh që mbahen në kampe. 70 mijë vetë mbahen në al Haël. 60 mijë prej tyre janë sirianë dhe irakianë dhe 10 mijë janë nga vende të treta dhe i janë bashkuar 2 mijë luftëtarëve të huaj terroristë.

Ambasadori Jeffrey theksoi: “Aty ekziston problemi i radikalizimit. Ne duam që t’ i largojmë këta njerëz nga andej dhe t’i kthejmë tek komunitetet e tyre”.

Burimi: DW

e.ll./dita

Flash Lajme

Më të lexuarat