Një familje nga Maqedonia është nisur për pushime verore në Greqi, me një bagazh gjysmë të zbrazët. Në kolonën para pikës kufitare greke, udhëtarët e tjerë janë habitur se si fëmijët e ulur në karriget e pasme në veturë, këmbët i kanë pasur të lëshuara teposhte deri në dyshemenë e veturës.

Para tyre nuk ka pasur as valixhe, as ndonjë shportë dhe as flladitës. Bile edhe gruaja e familjes së pasagjerëve ka qenë ulur me komoditetin më të madh mbi hapësirën e zbrazët para saj.

“Burri nxori diçka nga bagazhi. Në të kishte vetëm dy valixhe dhe një top. Nuk kishte shportë me domate dhe asnjë qese me pjeshkë. Sikur të shkonin për kohë të shkurtër, ka thënë një grua dëshmitare e kolonës”.

Udhëtari i çuditshëm iu bë i dyshimtë nëpunësve doganorë të Maqedonisë, shkruajnë mediat maqedonase, transmeton Shtegu.com

Ata filluan ta kontrollojnë në detaje veturën, sepse menduan se burri po i shfrytëzonte fëmijët dhe gruan si maskë për të trafikuar diçka të vlefshme në Greqi. Por, për çudi të madhe ata nuk gjetën asgjë.

“Në kufi erdhi një veturë e dyshimtë. Një person dyzetvjeçar, me një grua dhe dy fëmijë të moshës 6 dhe 9-vjeçare, pohonin se janë nisur për pushim veror dhjetëditor në Greqi. E kontrolluam personin e dyshimtë, për të cilin nuk gjetëm të dhëna policore. Pas kontrollit të detajuar të veturës, gjithashtu nuk u gjet asgjë e dyshimtë”, komentojnë nga pika kufitare e Bogorodicës.

Dëshmitarët kanë pohuar se maqedonasi gjithashtu ka pasur probleme edhe në kufirin grek. Ndryshe nga automjetet e tjera që kufirin e kaluan shumë shpejt, kjo veturë u ndalua për kontroll më të hollësishëm. Por, përveç rrobave, kostumeve të larjes dhe produkteve të higjienës personale, asgjë tjetër nuk ishte gjetur në veturë.


Flash Lajme

Më të lexuarat